He Maimai Aroha
na Tepene Mamaku
He tuku āroha atu tēnei, na ngā whānau o He Awhi Tikanga, Te Whetereihana o ngā waka, otirā, ngā whānau o Toi Māori Aotearoa. Ki te whānau piri, te whānau whānui, te hapū, me te iwi, o to mātou tuahine o ngā mahi toi maori. He roa ia e pēhia ana e te māuiui, a, anei rā, kua anga mua toona hikoi ki toona Atua, ki to tātou Matua. He mihi āroha hoki ki te Roopu raranga whatu o Aotearoa, he toronga rau harakeke kua hūtia, he rau no te Waonui a Taane kua taka mai i toona peka, kua tau ki runga o Papatuānuku.
He kupu e taea ai e te māngai, he kupu anō ka mau ki te ngākau, waiho ma te inoi, me te nohopuku, no reira Cath Brown, to mātou tuahine, whaea, takahia te ara whānui a Taane, okioki mai i roto i ngā ringa o Io Matuanui, haere atu hei kaaho mo tana whare whakairo. Hoki ki to tātou timatanga, e whanga mai nā o Mātua, Tūpuna, hei awhi ia koe, moe mai i roto ia Te Karaiti.
Na to whānau mahi Toi Māori, puta noa.